«Қазақтелеком» АҚ-ның Корпоративтік басқару кодексінің 2022 жылғы қағидалары мен ережелерінің сақталуы туралы есеп

Осы Есеп «Қазақтелеком» АҚ-ның Корпоративтік басқару кодексінің 5-тарауының 15-тармағына «Директорлар кеңесінің және атқарушы органның тиімділігіне» сәйкес дайындалды.

«Қазақтелеком» АҚ қызметі және оның корпоративтік практикасы Корпоративтік басқару кодексінің қағидалары мен ережелеріне толық сәйкестігін көрсетеді.

Кодекс тарауының атауына қарамастан, ол Қоғам өз қызметінде басшылыққа алуға міндетті және басшылыққа алатын бірқатар ережелерді қамтиды. Атап айтқанда, Қор ұйымдарының негізгі стратегиялық міндеті ұзақ мерзімді құнның өсуі және тұрақты даму болып табылады. Барлық қабылданған шешімдер мен әрекеттер даму стратегиясына сәйкес келуі керек.

Қоғамның органдары өз құзыреті шегінде шешімдер қабылдау және кез келген іс-әрекеттерді жүзеге асыру кезінде толығымен дербес және тәуелсіз болады. Акционерлер мен Қоғам арасындағы өзара қарым-қатынас (өзара іс-қимыл) тиісті корпоративтік басқару қағидаларына сәйкес Директорлар кеңесі арқылы жүзеге асырылады.

Қоғамның қызметі туралы ақпаратты ашу «Акционерлік қоғамдар туралы» Заңға және Қоғамның жарғысына сәйкес қажетті мәліметтерді (қаржылық есептілік депозитарийінің, биржалардың интернет-ресурстары) бұқаралық ақпарат құралдарына орналастыру арқылы жүзеге асырылады. Акционерлердің сұрауы бойынша ақпараттың бір бөлігі оларға жеке ұсынылды.

Қоғамда ішкі аудит қызметі жұмыс істейді, Комплаенс қызметі жұмыс істейді, Заңнамада және Қоғамның ішкі құжаттарында көзделген өз міндеттерін іске асыратын Корпоративтік хатшы мен Омбудсмен өкілеттіктерін жүзеге асырады.

Аталған ережелер төменде осы Есепте толығырақ ашылған.

Корпоративтік басқару жүйесі-бұл қоғамның қызметін басқару мен бақылауды, сондай-ақ Басқарма, Директорлар кеңесі, акционерлер мен мүдделі тараптар арасындағы қатынастар жүйесін қамтамасыз ететін процестердің жиынтығы. Бұл мәселелер Жарғыда, АЖЖ, ДК, Басқарма және басқа да ішкі құжаттарда нақты реттелген.

«Самұрық-Қазына» АҚ (бұдан әрі — Қор) ірі акционердің функцияларын іске асыру арқылы, сондай-ақ Директорлар кеңесі арқылы компанияларды басқаруға қатысады.

Қоғамның Директорлар кеңесі өз құзыреті шеңберінде шешімдер қабылдауда толық дербес. Қордың жекелеген мәселелер бойынша ұстанымы Қордың директорлар Кеңесіндегі өкілдері арқылы жеткізіледі.

Қоғамды басқаруды оның органдары заңнамаға және Жарғыға сәйкес жүзеге асырады.

Тұрақты даму жөніндегі іс-шараларды үйлестіруді Корпоративтік басқару қызметі жүзеге асырады. 2021 жылы «2060 жылға қарай көміртегі бейтараптығына қол жеткізу» мемлекеттік климаттық күн тәртібінен кейін, сондай-ақ «Самұрық-Қазына» АҚ тапсырмаларына сәйкес «Қазақтелеком» АҚ ESG қағидаттарын енгізуге және төмен көміртекті дамуға көшуге кірісті. 2022 жылы Директорлар кеңесінің 2022.12.09 №13 шешімімен «Қазақтелеком» АҚ-ның 2022-2032 жылдарға арналған Төмен көміртекті даму бағдарламасы қабылданды, оған сәйкес Компания алдағы 10 жылда парниктік газдар шығарындыларын 13%-ға қысқартуы тиіс. «Қазақтелеком» АҚ -ның 2021 жылғы Scope 1 және Scope 2 бойынша парниктік газдарды верификациялауды Верификациялау жөніндегі тәуелсіз орган жүзеге асырды. Орта және ұзақ мерзімді келешектегі жалпы корпоративтік стратегияның бөлігі ретінде төмен көміртекті даму бизнестің тұрақтылығын күшейтуге, қосымша инвестициялар тартуға, бизнесті жауапты басқару тұрғысынан Компанияның позициясын жақсартуға мүмкіндік береді. Төмен көміртекті даму бағдарламасын іске асыру «Қазақтелеком» АҚ-ның еліміздегі телекоммуникация саласының негізгі кәсіпорны ретінде Қазақстанның жалпымемлекеттік саясатына бейілділігін айғақтайды.

Компания өз алдына компанияның инвестициялық тартымдылығын арттырудың маңызды құралы болып табылатын ESG рейтингін алу міндетін қойды. «Қазақтелеком» АҚ Sustainalytics жетекші рейтингтік агенттігінен ESG-рейтингін алуға ниетті, осыған байланысты өз рейтингтік позицияларын нығайту бойынша шаралар мен бастамалар бұдан әрі қабылданатын болады.

Акционерлердің құқықтарын сақтау қоғамның негізгі міндеттемесі болып табылады. Қоғамда заңнамада және ішкі құжаттарда бекітілген акционерлердің құқықтары қатаң сақталады және акционерлерге әділ қарым-қатынас қамтамасыз етіледі. Акционерлерге олардың мүдделерін қозғайтын оқиғалар туралы, мысалы, акционерлер жиналыстары, қабылданған шешімдер және т.б. туралы уақтылы хабарланады. Қоғам акционерлерге олардың сұраныстары бойынша Қоғамның қызметі туралы қажетті ақпаратты жедел ұсынады.

Директорлар кеңесі ұйымға стратегиялық басшылық жасауды және Басқарма қызметіне бақылауды қамтамасыз ететін акционерлердің жалпы жиналысына есеп беретін басқару органы болып табылады.

Басқарма Директорлар кеңесіне есеп береді, ұйымның күнделікті қызметіне басшылықты жүзеге асырады және оның стратегияға, даму жоспарына және акционерлердің жалпы жиналысы мен Директорлар Кеңесі қабылдаған шешімдерге сәйкестігін қамтамасыз етеді.

Директорлар кеңесі мен басқарманың өкілеттіктері нақты бекітілген және бөлінген.

Директорлар кеңесі мен оның комитеттерінде қоғамның мүддесі үшін және барлық акционерлерге әділ қарауды және тұрақты даму қағидаттарын ескере отырып, тәуелсіз, объективті және тиімді шешімдер қабылдауды қамтамасыз ететін дағдылардың, тәжірибе мен білімнің теңдігі сақталады.

Қоғамның Директорлар кеңесі білімнің әртүрлі салаларындағы (телекоммуникация, қаржы, маркетинг, техникалық сала және т.б.), оның ішінде халықаралық жұмыс тәжірибесі мол мамандармен ұсынылған. Тәуелсіз директорлардың саны заң бойынша ұсынылғанға сәйкес келеді (кем дегенде 30%) және одан да көп.

Директорлар кеңесін сайлау тек заңдарда және Қоғамның Жарғысында белгіленген рәсімдер шеңберінде өтеді. Сайлау тәртібі, өкілеттік мерзімі, Директорлар кеңесінің қызметі Қоғамның ішкі құжаттарымен реттеледі. Директорлар кеңесінің жаңа сайланған мүшелері үшін лауазымға кіріспе бағдарламасы қолданылады.

Директорлар кеңесінің төрағасы Директорлар кеңесін жалпы басқаруға жауапты, Директорлар кеңесінің оның негізгі функцияларын толық және тиімді іске асыруын және Директорлар кеңесінің мүшелері, ірі акционерлер мен басқарма арасында сындарлы диалог құруды қамтамасыз етеді.

Директорлар Кеңесі төрағасының және атқарушы орган басшысының рөлі мен функциялары нақты бөлінген және Қоғамның Жарғысында, Директорлар кеңесі мен Басқарма туралы ережелерде бекітілген.

Директорлар кеңесінің комитеттері Директорлар кеңесінің құзыретіне кіретін мәселелерді терең және мұқият қарауға және әсіресе аудит, тәуекелдерді басқару, стратегиялық жоспарлау, кадрлық және әлеуметтік мәселелер сияқты бағыттар бойынша қабылданатын шешімдердің сапасын арттыруға ықпал етеді. Қоғамда 2022 жылы аудит және тұрақты даму, кадрлар, сыйақылар және әлеуметтік мәселелер, стратегиялық жоспарлау жөніндегі үш комитет жемісті қызмет атқарды. Олардың рөлі олар туралы ережелерде нақты реттелген, олар көптеген мәселелерді қарастырады және Директорлар кеңесіне қажетті ұсыныстар береді. Комитеттер қызметінің қорытындыларын Директорлар кеңесі үнемі қарайды және оң бағалайды.

Директорлар кеңесінің отырыстарын дайындау және өткізу оның қызметінің барынша нәтижелілігіне ықпал етеді. Директорлар кеңесінің мүшелері өз міндеттерін орындау үшін толық, өзекті және уақтылы ақпаратқа қол жеткізе алады.

Директорлар кеңесі өз функцияларын тиімді орындау үшін тұрақты отырыстар өткізеді. Директорлар Кеңесінің отырыстары күнтізбелік жыл басталғанға дейін бекітілетін жұмыс жоспарына сәйкес өткізіледі. Директорлар кеңесінің және оның комитеттерінің отырыстарын өткізу дауыс берудің күндізгі немесе сырттай нысандары арқылы жүзеге асырылады, бұл ретте сырттай дауыс беру болатын отырыстардың саны барынша азайтылады. 2022 жылы Директорлар кеңесінің отырыстары сырттай өткізілген жоқ. Маңызды және стратегиялық сипаттағы мәселелер бойынша шешімдерді қарау және қабылдау бетпе-бет дауыс беру арқылы Директорлар кеңесінің отырыстарында ғана жүзеге асырылады.

Директорлар кеңесінің және оның комитеттерінің отырыстарын талқылау қорытындылары мен қабылданған шешімдерді көрсете отырып корпоративтік хатшы тиісінше хаттамалайды.

Директорлар кеңесінің қызметін тиімді ұйымдастыру және Директорлар кеңесінің, Басқарманың акционерлермен, Директорлар кеңесімен өзара іс-қимылы мақсатында өз функцияларын заңнамаға, Жарғыға және басқа да ішкі құжаттарға сәйкес жүзеге асыратын Корпоративтік хатшы тағайындалды.

Қоғамда алқалы атқарушы органы Басқарма жұмыс істейді. Басқарма Директорлар кеңесіне есеп береді және Қоғамның күнделікті қызметіне басшылықты жүзеге асырады, Директорлар кеңесі мен акционерлердің жалпы жиналысы қабылдаған стратегияны, даму жоспарын және шешімдерді іске асыруға жауапты болады.

Директорлар кеңесі басқарма басшысы мен мүшелерін сайлайды, өкілеттік мерзімдерін, лауазымдық жалақысының мөлшерін, олардың еңбегіне ақы төлеу шарттарын айқындайды. Атқарушы органның басшысын және мүшелерін үш жылға дейінгі мерзімге сайлау туралы ұсыныс сақталады.

Атқарушы орган басшысының және мүшелерінің уәждемелік ПӘК-ті Директорлар кеңесі жыл сайын бекітеді.

Корпоративтік жанжалдар туындаған жағдайда қатысушылар ұйым мен мүдделі тараптардың мүдделерін тиімді қорғауды қамтамасыз ету мақсатында келіссөздер арқылы оларды шешу жолдарын іздейді.

Іскерлік этика қағидаттарын сақтау және қоғамда туындайтын әлеуметтік-еңбек дауларын оңтайлы реттеу мақсатында Омбудсмен тағайындалды. Омбудсменнің рөлі — өзіне жүгінген қызметкерлерге, еңбек дауларына, жанжалға қатысушыларға консультация беру және оларға Қазақстан Республикасы заңнамасының нормаларын сақтауды (оның ішінде қажет болған жағдайда құпиялылықты сақтауды) ескере отырып, өзара қолайлы, сындарлы және іске асырылатын шешімді әзірлеуге жәрдемдесу, проблемалық әлеуметтік-еңбек мәселелерін шешуге жәрдемдесу, сондай-ақ Қоғам қызметкерлерінің іскерлік этика қағидаларын сақтау.

Комплаенс қызметі белсенді және тиімді жұмыс істейді, оның мақсаты сыбайлас жемқорлыққа қарсы іс-қимыл және қоғам мен еншілес ұйымдардың ішкі корпоративтік мәдениетін қалыптастыру мәселелері бойынша міндетті реттеуші талаптардың және үздік халықаралық практиканың сақталуын қамтамасыз ету, қызметкерлер арасында ашықтықты, адалдықты қамтамасыз ету мақсатында, сондай-ақ үздік халықаралық стандарттарға, ішкі саясаттар мен Қазақстан Республикасының заңнамаларына сәйкес бизнесті жүргізу үшін жағдайлар жасау болып табылады.

Қоғамда тәуекелдерді басқару және ішкі бақылау жүйесі жұмыс істейді. Директорлар кеңесі тәуекелдерді басқару саласында белсенді рөл атқарады.

Тәуекелдерді басқару саласындағы есептерді тоқсан сайын Аудит және тұрақты даму комитеті мен Директорлар Кеңесі қарайды. Қажет болған жағдайда олар осы саладағы іс шаралар мен процестерді реттейді.

Қоғамда Директорлар кеңесіне есеп беретін Ішкі аудит қызметі тиімді жұмыс істейді. ІАҚ есептерін Аудит және тұрақты даму комитеті мен Директорлар кеңесі тоқсан сайын қарайды.

Мүдделі тараптардың мүдделерін сақтау мақсатында Қоғам өз қызметінің қаржылық жай-күйін, қызметінің нәтижелерін, меншік және басқару құрылымын қоса алғанда, барлық маңызды аспектілері туралы ақпаратты уақтылы және сенімді түрде ашады. Тиісті ақпарат әртүрлі ресурстарда, оның ішінде қаржылық есептілік депозитарийі мен қор биржасының интернет-ресурстарында орналастырылады.

Қоғам жыл сайын тәуелсіз және білікті аудиторды тарту арқылы қаржылық есептілікке аудит жүргізеді. Сыртқы аудитор тексерген жылдық қаржылық есептілікті жыл сайын акционерлердің жалпы жиналысы бекітеді.

Сондай-ақ жыл сайын Қоғам тұрақты даму жөніндегі іс-шараларды қоса алғанда, өткен жылдағы Қоғам қызметінің барлық тараптары ашылатын біріктірілген жылдық есепті бекітеді.